Ganesh Visarjan 2020 | दरवर्षी ढोल ताशाच्या गजरात, वाजतगाजत गणपती बाप्पाला निरोप दिला जातो. पण यंदा कोरोनामुळे अत्यंत साधेपणाने गणरायाला निरोप दिला जाणार आहे.
हिंगोली : हिंगोली शहरात दरवर्षी अनंत चतुर्थी निमित्त मोठ्या जल्लोषात निघणारी कावड यात्रा कोरोणाच्या पार्श्वभूमीवर यावर्षी रद्द करण्यात आली आहे. दरवर्षी या कावड यात्रेला शहरातील हजारो भाविक उपस्थित असतात. सोबतच शहरातील कावड यात्रा देखील असतात. मात्र यावर्षी चार ते पाच मोजक्याच लोकात कावड यात्रा संपन्न झाली असून कयाधू नदी तिल पाण्याने चिंतामणी गणपती ला जल अभिषेक करण्यात आला.
जळगाव : यंदा कोरोनाच सावट असल्याने गणेश विसर्जन सोहळ्यावर मोठ्या प्रमाणावर मर्यादा आहेत,जळगाव जिल्ह्यात कोरोनाचा वाढता प्रसार पाहता गणेश विसर्जन काळात गर्दी करून त्यात आणखी भर पडू नये या साठी गर्दी न करता घरच्या घरीच आपल्या लाडक्या बाप्पाचं विसर्जन करावं असं आवाहन भाजपचे खासदार उन्मेष पाटील यांनी गणेश भक्तांना यावेळी केलं आहे,त्याला सर्व थरातून चांगला प्रतिसाद देखील मिळत असल्याचे पाहायला मिळत आहे.
बेळगाव : संयुक्त महाराष्ट्र चौकातील मानाच्या गणपतीची आमदार अनिल बेनके आणि मान्यवरांनी आरती केली. त्यानंतर गणपतीच्या विसर्जन मिरवणुकीला प्रारंभ झाला.प्रशासनाने घालून दिलेल्या नियमानुसार मोजकेच कार्यकर्ते मिरवणुकीत सहभागी झाले होते.दरवर्षी विसर्जन मिरवणुकीच्यावेळी पाहायला मिळणारी गर्दी आणि भक्तांचा उत्साह,आतषबाजी,वाद्यांचा आणि डॉल्बीच्या दणदणाट कोरोनामुळे यावर्षी पाहायला मिळाला नाही.सायंकाळी सहाच्या अगोदर सार्वजनिक मंडळांनी विसर्जन करावे अशी सूचना पोलीस खात्याने केल्यामुळे सकाळी दहापासून सार्वजनिक गणेशोत्सव मंडळांनी विसर्जन करण्यास प्रारंभ केला आहे.
पुणे : पुण्यातील गणपती विसर्जनाला अल्का चौकात भक्तांचा महापूर पहायला मिळतो. म्हणूनच या चौकात येणारे पाच ही मुख्य रस्त्यावरील वाहतूक बंद असतात. तर महापालिकेचा एक मंच मंडळाच्या स्वागतासाठी सज्ज असतो. परंतु, यंदा कोरोनामुळे अल्का चौकात गणेशभक्तांची गर्दी दिसणार नाही.
मुंबईतील गिरगाव चौपाटीवर गणेश विसर्जनाला सुरुवात झाली आहे. या परिसरातील स्थानिक नागरिक छोट्या गणपती मूर्तींचे विसर्जन करण्यासाठी चौपाटीच्या दिशेने येत आहेत. गिरगाव चौपाटी परिसरात महानगरपालिका आणि मुंबई पोलीस दल सज्ज झाले आहे.
शिर्डी : संगमनेरमधील रंगारगल्ली मित्र मंडळ या मानाच्या गणपतीला पहिल्यांदाच ढोलताशाविना निरोप दिला जात आहेत. महसूलमंत्री बाळासाहेब थोरात यांच्या हस्ते मानाच्या गणरायाचं पूजन झालं. संगमनेर शहरात 1895 साली या गणरायाच्या उत्ससाला सुरुवात झाली होती
नागपुरात गणपती विसर्जनाला सुरुवात झाली आहे. महापालिकेने शहरात उभारलेल्या 176 कृत्रिम तलावात विसर्जन केले जात आहे. यंदा दर वर्षीच्या तुलनेत एक तृतीयांश सार्वजनिक मंडळांनी गणपती स्थापना केली होती. दरवर्षी सुमारे अकराशे सार्वजनिक गणपती असायचे, यंदा फक्त 365 सार्वजनिक गणपती आहेत. हजारो घरगुती गणपती यंदा नियमाप्रमाणे कृत्रिम तलावात विसर्जित केले जात आहेत. तर सार्वजनिक गणपती मंडळांना मंडपात किंवा जवळपासच्या कृत्रिम तलावात मूर्ती विसर्जित करण्यास सांगितल्याने सर्वत्र शांततेत विसर्जन प्रक्रिया सुरु झाली आहे.
कसबा गणपतीचे सकाळी 11.30 वाजता विसर्जन होईल. त्याचप्रमाणे तांबडी जोगेश्वरी गणपतीचे विसर्जन दुपारी 12.15 वाजता, गुरुजी तालीमचा गणपती दुपारी 1 वाजता, तुळशीबाग गणपती दुपारी 1.45 वाजता, केसरी वाडा गणपती दुपारी 2.30 वाजता, श्रीमंत भाऊ भाऊसाहेब रंगारी गणपतीचे दुपारी 3.15 वाजता, श्रीमंत दगडूशेठ हलवाई गणपती सूर्यास्ताच्या वेळी सायंकाळी 6.47 वाजता, अखिल मंडई मंडळाचा गणपती सायंकाळी 7 वाजता विसर्जन होईल.
पुण्यातील मानाचे गणपती आणि प्रमुख गणपती मंडळ मंडपात किंवा मंदिरातच बाप्पांचं विसर्जन करणार आहेत. मानाचा पहिला कसबा गणपतीच्याही विसरजनाची तयारी पूर्ण झाली आहे. उत्सव मंडपातच विसर्जन हौद तयार करण्यात आला आहे. पुण्यातला मानाचा दुसरा तांबडी जोगेश्वरी गणपतीचंही उत्सव मंडपातच विसर्जन करण्यात येणार आहे. तांबडी जोगेश्वरी गणपतीचा विसर्जन हौद सजवून तयार आहे. उत्सव मंडपामध्ये फुलांच्या पायघड्या घालण्यात आल्या आहेत.
पार्श्वभूमी
मुंबई : आज अनंत चतुर्दशी. गणपती बाप्पा मोरया, पुढच्या वर्षी लवकर या असं म्हणत लाडक्या गणपती बाप्पाला निरोप देण्याचा दिवस. दरवर्षी ढोल ताशाच्या गजरात, वाजतगाजत गणपती बाप्पाला निरोप दिला जातो. पण यंदा कोरोनामुळे अत्यंत साधेपणाने गणरायाला निरोप दिला जाईल. अनंत चतुर्दशीला मुंबईतील माहौल कसा असतो, हे वेगळं सांगण्याची गरज नाही. पण यावर्षी मुंबईचा राजा, लालबागचा राजा किंवा इतर कोणत्याही सार्वजनिक गणेश मंडळांनी गणेशोत्सव साजरा न करण्याचं निर्णय घेतला आहे. परिणामी पण यंदाचं चित्र पूर्णत: वेगळं आहे. तर पुण्यातील गणेशोत्सवाची ख्यातीही देशभरात आहे, कोरोना संकटात इथेही साधेपणा विसर्जन सोहळा पार पडणार आहे. मानाच्या गणपतीचं मंडपातच विसर्जन होणार आहे.
0 comments:
Post a Comment
please do not enter any spam link in comment box.